I ಕರ್ನಾಟಕ ಅಲೆಮಾರಿ ಹಕ್ಕಿಪಿಕ್ಕಿ ಬುಡಕಟ್ಟು I ಸಂರಕ್ಷಣ ಸಮಿತಿಯಿಂದ ಹೋರಾಟದ ಎಚ್ಚರಿಕೆ I
ಶಿವಮೊಗ್ಗ: ಈಚೆಗೆ ಮುಖ್ಯಮಂತ್ರಿ ಸಿದ್ದರಾಮಯ್ಯನವರು ಅರಣ್ಯದಂಚಿನ ಹಾಡಿಗಳಲ್ಲಿ ವಾಸ ಮಾಡುತ್ತಿರುವ ಬುಡಕಟ್ಟು ಜನಾಂಗಗಳಾದ ಜೇನುಕುರುಬ, ಇರುಳಿಗ, ಕೊರಗ, ಸೋಲಿಗ, ಯರವ ಪಣಿಯನ್, ಹಸಲರು, ಗೌಡಲು, ಸಿದ್ದಿ, ಬೆಟ್ಟಕುರುಬ, ಕಾಡುಕುರುಬ, ಕುಡಿಯ, ಮಲೆಕುಡಿಯ ಜನಾಂಗಗಳಿಗೆ ರಾಜ್ಯ ಸಿವಿಲ್ ಸೇವೆಗಳಲ್ಲಿ ಪ್ರಾತಿನಿಧ್ಯ ನೀಡುವ ಸಲುವಾಗಿ ವಿಶೇಷ ನೇರ ನೇಮಕಾತಿ ಕೈಗೊಳ್ಳುವುದಾಗಿ ಸದನದಲ್ಲಿ ಹೇಳಿದ್ದಾರೆ.
ಈ ಕಾರ್ಯ ಸ್ವಾಗತಾರ್ಹ ಆದರೆ ಈ ಪಟ್ಟಿಯಲ್ಲಿ ಈಗಲೂ ಅರಣ್ಯದಂಚಿನಲ್ಲಿ ವಾಸಿಸುತ್ತಾ ಇನ್ನೂ ಅರಣ್ಯವನ್ನೇ ನಂಬಿರುವ ಅಪ್ಪಟ ಅರಣ್ಯವಾಸಿಗಳಾದ ಹಕ್ಕಿಪಿಕ್ಕಿ, ಪಾರ್ಥಿ, ಹರಣಿಸಿಕಾರಿ, ವಾಗಿರಿ, ಅಡವಿಚೆಂಚರು ಸಮುದಾಯಗಳನ್ನು ಈ ಪಟ್ಟಿಯಿಂದ ಕೈಬಿಟ್ಟಿರುವುದು ಅಘಾತವನ್ನುಂಟು ಮಾಡಿದೆ ಎಂದು ಕರ್ನಾಟಕ ಅಲೆಮಾರಿ ಹಕ್ಕಿಪಿಕ್ಕಿ ಬುಡಕಟ್ಟು ಸಂರಕ್ಷಣ ಸಮಿತಿ ಬೇಸರ ವ್ಯಕ್ತ ಪಡಿಸಿದೆ. ಹಕ್ಕಿಪಿಕ್ಕಿ ಎಂದೇ ಕರೆಯಲಾಗುವ ಈ ಐದೂ ಸಮುದಾಯಗಳು ಮೂಲತಃ ಅರಣ್ಯವಾಸಿಗಳು ಮತ್ತು ಅಪ್ಪಟ ಅದಿವಾಸಿಗಳಾಗಿದ್ದಾರೆ. ಇದನ್ನು ಅನೇಕ ಮಂದಿ ಮಾನವಶಾಸ್ತ್ರಜ್ಞರು, ಕುಲಶಾಸ್ತ್ರೀಯ ಅಧ್ಯಯನಕಾರರು, ಸಂಶೋದಕರೇ ಮುಂತಾದ ಪ್ರಾಪ್ತರು ತಮ್ಮ ಗ್ರಂಥಗಳಲ್ಲಿ ಸಾಬೀತುಪಡಿಸಿದ್ದಾರೆ.
ವಿದೇಶಿ ವಿದ್ವಾಂಸರಾದ ಎಡ್ಗರ್ ಥಸ್ಟರ್ನ್, ಎಂಡೋಪನ್ ನವರೊಂದಿಗೆ ಕೆ.ಎಸ್.ಸಿಂಗ್. ನಂಜುಂಡಯ್ಯ ಮತ್ತು ಅಯ್ಯರ್ ಅಂತಹ ಸ್ವದೇಶಿ ಸಂಶೋದಕರು ತಮ್ಮ ಗ್ರಂಥಗಳಲ್ಲಿ ದಾಖಲಿಸಿದ್ದಾರೆ. ಇಂದಿಗೂ ಹಕ್ಕಿಪಿಕ್ಕಿ ಜನಾಂಗದವರಾದ ನಾವು ಅರಣ್ಯ ಉತ್ಪನ್ನಗಳನ್ನು ಸಂಗ್ರಹಿಸುತ್ತಾ, ಬೇಟೆಯಾಡುತ್ತಾ, ಔಷದೀಯ ಮೂಲಿಕೆಗಳನ್ನು ಸಂಗ್ರಹಿಸಿ ನಾಡಿನ ಜನಕ್ಕೆ ವೈದ್ಯಕೀಯ ಸೇವೆ ನೀಡುತಿದ್ದೇವೆ.
ನಮ್ಮ ಸಮುದಾಯಕ್ಕೆ ಎಲ್ಲಿಯೂ ಪ್ರಾತಿನಿಧ್ಯ ಸಿಕ್ಕಿಲ್ಲ. ಸಾಮಾಜಿಕವಾಗಿ, ಔದ್ಯೋಗಿಕವಾಗಿ, ಶೈಕ್ಷಣಿಕವಾಗಿ, ಅತ್ಯಂತ ದಮನಿತರಾಗಿರುವ ನಮ್ಮನ್ನು ಸದರಿ ಪಟ್ಟಿಯಲ್ಲಿ ಸೇರಿಸಬೇಕೆಂದು ಕೋರುತ್ತಾ ಹಾಗೇನಾದರೂ ಸೇರಿಸದೇ ಹೋದರೆ ನಾವು ನಾಡಿನಾದ್ಯಂತ ಹೋರಾಟವನ್ನು ಹಮ್ಮಿಕೊಳ್ಳ ಬೇಕಾಗುತ್ತದೆ ಎಂದು ಸಮಿತಿಯ ರಾಜ್ಯಾಧ್ಯಕ್ಷ ಜಗ್ಗು ಅವರು ಪ್ರಕಟಣೆಯ ಮೂಲಕ ಎಚ್ಚರಿಸಿದ್ದಾರೆ.
