I ಸೇವಾಪತ್ರದ ಹೆಸರಿನಲ್ಲಿ ಕೋಟ್ಯಾಂತರ ರೂ ಲೂಟಿಗೆ ನಿಂತ ಖಾಸಗಿ ಮ್ಯಾನ್‌ಪವರ್ ಏಜೆನ್ಸಿಗಳು I ತನಿಖೆಗೆ ಮುಂದಾಗುವಂತೆ ಪಾಲಿಕೆ ಆಯುಕ್ತರಿಗೆ ಒತ್ತಾಯಿಸಿದ ತೇಜೇಶ್ ರಾಮಚಂದ್ರ I
ಶಿವಮೊಗ್ಗ : ರಾಜ್ಯ ಸರ್ಕಾರದ ಆದೇಶ ಪತ್ರದಂತೆ ಮಹಾನಗರಪಾಲಿಕೆಯ ನೇರನೇಮಕಾತಿ, ನೇರಪಾವತಿ ವಿಷಯದಲ್ಲಿ ದಿನಗೂಲಿ ಪೌರ ಕಾರ್ಮಿಕರಿಗೆ ಹಣದ ಬೇಡಿಕೆಯಿಟ್ಟು ಬೆದರಿಸುತ್ತಿರುವ ಖಾಸಗಿ ಮ್ಯಾನ್ ಪವರ್ ಏಜೆನ್ಸಿಯ ಪರವಾನಿಗೆಯನ್ನು ರದ್ದು ಪಡಿಸುವಂತೆ ಸಂಬಂಧಿಸಿದ ಇಲಾಖೆಗೆ ಶಿಫಾರಸ್ಸು ಮಾಡಬೇಕು ಹಾಗೂ ಕಾನೂನು ರಿತ್ಯಾ ಕ್ರಮ ಕೈಗೊಳ್ಳಲು ತನಿಖಾ ತಂಡ ರಚಿಸುವಂತೆ ಶಿವಮೊಗ್ಗದ ಪಾಲಿಕೆ ಆಯುಕ್ತರಿಗೆ ಕರ್ನಾಟಕ ಮಾದರ ಮಹಾಸಭಾದ ತೇಜೇಶ್ ರಾಮಚಂದ್ರ ಒತ್ತಾಯಿಸಿದರು.
ಅವರು ಇಂದು ಕರೆಯಲಾಗಿದ್ದ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡುತ್ತಾ ಶಿವಮೊಗ್ಗ ಮಹಾನಗರಪಾಲಿಕೆಯಲ್ಲಿ ದಿನಗೂಲಿ ಕೆಲಸ ಮಾಡುವ ಕಾರ್ಮಿಕರಿಂದ ನೇರಪಾವತಿ ಅರ್ಹತೆಗೆ ಸರ್ಕಾರ ಆದೇಶಿಸಿದೆ. ಇದರನ್ವಯ ಪೌರ ಕಾರ್ಮಿಕರ ಗುತ್ತಿಗೆ ಪಡೆದ ಖಾಸಗಿ ಮ್ಯಾನ್ ಪವರ್ ಏಜೆನ್ಸಿಯವರು ಪೌರ ಕಾರ್ಮಿಕರಿಂದ ಸೇವಾ ಪತ್ರ ನೀಡಲು ೪ ಲಕ್ಷ. ೫ ಲಕ್ಷ ಹಣ ಕೇಳುತ್ತಿದ್ದಾರೆ ಇದೊಂದು ನೇಮಕಾತಿಯ ಸೇವಾಪತ್ರದ ಅಕ್ರಮ ಪ್ರಕರಣವಾಗಿದ್ದು ಈಗಾಗಲೇ ನೇರನೇಮಕಾತಿಯ ೧೦೪ ಹುದ್ದೆ ಹಾಗೂ ನೇರಪಾವತಿಯ ೧೭೯ ಹುದ್ದೆಗಳು ಸೇರಿದಂತೆ ೨೮೩ ಹುದ್ದೆಗಳಿಗೆ ಸರಿ ಸುಮಾರು ಐದು ಲಕ್ಷದಂತೆ ೧೪ ಕೋಟಿ ೧೫ ಲಕ್ಷರೂಗಳ ಬಹುದೊಡ್ಡ ಇಡಿ ತನಿಖಾ ಸಂಸ್ಥೆ ತನಿಖಿಸಬಹುದಾದ ನೇಮಕಾತಿ ಹಗರಣವಾಗಿದ್ದು ಇದರ ನಿಷ್ಟಕ್ಷಪಾತ ತನಿಖೆಗೆ ಶಿವಮೊಗ್ಗ ಮಹಾನಗರ ಪಾಲಿಕೆ ಮುಂದಾಗಬೇಕೆಂದು ಅವರು ಈ ಸಂದರ್ಭದಲ್ಲಿ ಆಗ್ರಹಿಸಿದರು.
ಈ ಹಣದ ಬೇಡಿಕೆಯ ಆತಂಕಕ್ಕೆ ಬಿದ್ದಿರುವ ದಿನಗೂಲಿ ಕಾರ್ಮಿಕರು ಹಣಕ್ಕಾಗಿ ಪರದಾಡುತ್ತಿದ್ದಾರೆ ಎಂದು ಹೇಳಿದರಲ್ಲದೆ ಸುದ್ದಿಗೋಷ್ಟಿಯಲ್ಲಿ ಮಾತನಾಡಿದ ಅವರು ನಗರಪಾಲಿಕೆಯಲ್ಲಿ ಹಲವು ವರ್ಷಗಳಿಂದ ಪೌರ ಕಾರ್ಮಿಕರಾಗಿ ಸೇವೆ ಸಲ್ಲಿಸುತ್ತಿರುವ ಸುಮಾರು ೩೦೦ ಕ್ಕೂ ಹೆಚ್ಚು ಗುತ್ತಿಗೆ ಕಾರ್ಮಿಕರಿಗೆ ನೇರ ಪಾವತಿಗೆ ಆದೇಶ ನೀಡಿದೆ, ಇದಕ್ಕೆ ಬೇಕಾದ ದಾಖಲಾತಿಗಳನ್ನು ನೇಮಕದ ಗುತ್ತಿಗೆ ಪಡೆದ ಖಾಸಗಿ ಏಜೆನ್ಸಿಯವರು ಸೇವಾ ಪತ್ರ ನೀಡಬೇಕು. ಇದಕ್ಕಾಗಿ ಆ ಏಜೆನ್ಸಿಯವರು ಲಕ್ಷಾಂತರ ಹಣ ಕೊಡಿ. ಇಲ್ಲವೆಂದರೆ ನಿಮ್ಮ ಕೆಲಸ ಖಾಯಂ ಆಗುವುದಿಲ್ಲ ಎಂದು ಬೆದರಿಸಿ ಶೋಷಣೆ ಮಾಡುತ್ತಿರುವುದು ಸಾಮಾಜಿಕ ನ್ಯಾಯವಲ್ಲವಾಗಿದೆ ಎಂದು ಮಾದಿಗ ಮಹಾಸಭಾದ ತೇಜೇಶ್ ರಾಮಚಂದ್ರ ಅವರು ವಿವರಿಸಿದರು.
ಇದರಿಂದ ಕಾರ್ಮಿಕರು ಬಡ್ಡಿಗೆ ಹಣ ತಂದು ಕೊಡುವ ಸ್ಥಿತಿ ನಿರ್ಮಾಣವಾಗಿದೆ. ಇದರ ಬಗ್ಗೆ ಶಿವಮೊಗ್ಗ ಪಾಲಿಕೆಯ ಆಯುಕ್ತರು ಗಂಬೀರವಾಗಿ ಪರಿಗಣಿಸಬೇಕು, ಹಾಗೂ ಕೂಡಲೇ ತನಿಖಾ ತಂಡ ರಚಿಸಿ ತನಿಖಿಸಬೇಕು ಎಂದು ಅವರು ತಿಳಿಸಿದರು, ಇಲ್ಲವಾದಲ್ಲಿ ಹೋರಾಟ ಅನಿವಾರ್ಯವಾಗಲಿದೆ ಎಂದು ಈ ಮೂಲಕ ಎಚ್ಚರಿಸಿದರು ಗೋಷ್ಟಿಯಲ್ಲಿ ಹೆಚ್.ಶಿವಾಜಿ, ಸೂಲಯ್ಯ, ಅಣ್ಣಪ್ಪ, ಜಗದೀಶ್, ಬೋಜಪ್ಪ. ರಮೇಶ್, ಸತೀಶ್ ಕುಮಾರ್, ಸುನೀಲ್ ಕುಮಾರ್, ಗಾಜನೂರು ನಾಗರಾಜ್, ಸೇರಿದಂತೆ ಹಲವರು ಉಪಸ್ಥಿತರಿದ್ದರು.
