ಬರೆಯುತ್ತಾರೆ ಗಾರಾ.ಶ್ರೀನಿವಾಸ್
I ಎದೆಹಾಳೆಯ ಗೆಳತಿ I
ತುಸು ಕತ್ತಲ ಕವಲಿನಲಿ
ರಸಕಂಗಳ ಬಿತ್ತಿ,
ಮಿಂಚು ಹುಳುವಿನ ಬೆಳಕಿನಲಿ
ಚೆಲುವಿನ ಪಾದಗಳ ಹೊತ್ತಿ,
ನೀಳ ಕೇಶದಿ, ನೀಲಮೇಘನ
ಕಾವಣದೊಳಗಿಹ ಗೆಳತಿ
ನೀನೊಮ್ಮೆ ಹಾಡಿ ಬಿಡು…
ಹೊತ್ತಾರೆಗೆ ಹೊತ್ತಿದೆ, ಕನಸುಗಳೀಗ ಮುತ್ತಿದೆ
ಎತ್ತ ದಿಟ್ಟಿಸಿದರು ಬಿಗಿದಪ್ಪುವ ನಗುಗಳು,
ಸುಳಿದು ಹೊಕ್ಕುತಿಹವು ಪಿಸು ದನಿಗಳು
ಬಳ್ಳಿಯಂತೆ ಸುತ್ತಿ, ಕಾವಿಡುವ ಬೆಸುಗೆಯೊಳು
ಒಮ್ಮೆ ಹಾಡಿ ಬಿಡು…
ಮಲೆನಾಡ ಸೊಗಡಿನ ಸೊಗಸಿನಲಿ
ಕೈ -ಬಳೆ, ಓಲೆ-ಜುಮುಕಿಯ ಸದ್ದಿನಲಿ,
ನನ್ನ ನಾಳೆಗಳ ಹಾಳೆಗೆ
ನಿನ್ನ ಮೊಗದಾವರೆಯ ಚಿತ್ರವಿರಲಿ,
ಗೆಳತಿ ನೀನೊಮ್ಮೆ ಹಾಡಿ ಬಿಡು…
ಕೇಳಿದೆ, ನೀ ಚಿತ್ರಗಳ ಕಳುಹಿದೆ,
ಈ ಎದೆ ಗೂಡಿನಲಿ ಕತ್ತಲಗಳದು ದೂಡಿದೆ,
ಅಲ್ಲೊಂದು ಹೊಂಗನಸ ಚಿಗರೊಡೆಸಿ
ಎದೆಯ ಹಾಳೆಗಳಲಿ ರಂಜಿಸುತ್ತಿದೆ,
ಗೆಳತಿ ಹಾಡಿ ಬಿಡು.