I ಏನು ಬರೆಯಲಿ ಗೆಳತಿ I

ಬರೆಯುತ್ತಾರೆ ಗಾರಾ.ಶ್ರೀನಿವಾಸ್

I ಏನು ಬರೆಯಲಿ ಗೆಳತಿ I

ಏನು ಬರೆಯಲಿ ನಾನು ನಿನ್ನ ಕುರಿತು
ನಸುನಗೆಯ ಬಿತ್ತಿ, ಹೊಸಬಗೆಯ ಹೊತ್ತಿ,
ಬೊಗಸೆ ಕಂಗಳಲಿ, ದಿಟ ನೋಟ ಮೊಗೆದು
ಎದೆಗೂಡಿನ ಪ್ರಶ್ನೆಗಳ ಕಾತರದ ಕಾವಿಟ್ಟ,
ಸುಗಂಧಿತ ದುಂಡು ಮಲ್ಲಿಗೆ ಮುಡಿದವಳೇ,
ನಾ ಏನು ಬರೆಯಲಿ ನಿನ್ನ ಕುರಿತು.

ಬಳ್ಳಿ ಹಬ್ಬಿದಂತಿರುವ ನೀಲವರ್ಣದ ನೀರೆ,
ಮುಳ್ಳು ಮೊನಚಿನಂಚಿನಲಿ ಅರಳಿದ ಮೊಗಧಾವರೆ
ದುಟಿಯಂಚಿನ ಇಳಿದಾದೆಡೆ ಕಪ್ಪು ಚುಕ್ಕಿ,
ದೃಷ್ಠಿ ಬೊಟ್ಟಿನಂತಿದೆ ಸೊಗಸಿನಂದಣವೇ..!
ನಾ ಏನು ಬರೆಯಲಿ ನಿನ್ನ ಕುರಿತು.

ಆತ್ಮದ ಮಾತಿಗೆ ಕಟಿಬಿದ್ದೆ,
ಸ್ನೇಹ ಸಾಂಗತ್ಯದ ಬಾನಕ್ಕಿಗೆ ರೆಕ್ಕೆ-ಪುಕ್ಕಗಳ ಕಟ್ಟಿದೆ,
ಹೊಳಪಿನ ಪಾದಗೆಜ್ಜೆಯ ಸದ್ದು ಆಲಿಸಿದೆ,
ಮಾತು-ಮೌನದ ಹೊತ್ತು ಹೊತ್ತಿಗೆಯಾಗಿಸಿದೆ,
ಅದೆಷ್ಟು ಪುಟಗಳ ತಿರುವಿದರು ನಿನ್ನ ಪ್ರತಿಬಿಂಬಿಸಿದೆ
ಹೊಂಗನಸಿನ ಕಾವಣದ ರಸದೊಡತಿಯೇ..
ನಾ ಏನು ಬರೆಯಲಿ ನಿನ್ನ ಕುರಿತು.
.
ಬೆಸುಗೆಯ ಧಾವಂತವಿದೆ, ಅಣಿಮುತ್ತುಗಳ ಅಣಿತಿಗೆ ಕಾಯುವೆ,
ಉಲ್ಲಾಸದ ಉನ್ಮಾದಿತ ಭಾವಗಳು ಸುಳಿದಾಡುತಿಹವು
ಚಂದಿರನ ಬಿಂದಿಗೆಯ ಬೆಳಕಿನೊಳಗೆ,
ಹಸಿರ ಹಾಸುಗಳಲಿ ಹೊಕ್ಕಿ, ಕಡಲಚಿಪ್ಪಿನ ಮುತ್ತುಗಳ ಸುರಿಸಿ.
ಬೆವರ ಮಳೆಯಲಿ ಮಿಂದು, ಮನಮೃದುಗಳಲಿ
ಮಧುಪಾನದಿ ತೇಲುವ ಉಕ್ಕಡವಾಗುವೆ.
ಹೇಳು ಗೆಳತಿ ನಾನು ಏನು ಬರೆಯಲಿ ನಿನ್ನ ಕುರಿತು.